من قلب الريف لقاء غير متوقع على طريق فرعي

انا نسكن في منطقة ريفية تبعد حوالي اكثر من 15 كم عالمعتمدية وين قريت من السابعة اساسي حتى الباك متاعي كانت 2007
وفي العام هذاكا صارتلي حكاية غريبة ديما نتفكرها بأدق تفاصيلها
بطبيعة الحال في الصيف هذاكا نمشي برشا مرات للمعتمدية متاعي بحكم اوراق و كذا وكذا وكنت نتنقل بموتور (mobylette) وما كنتش نمشي مع الطريق الرئيسي الكياس خاطر عندنا طري فرعي (قصة عربي) تربحني مسافة و وقت اما خلا و قفار و سبخة و زيد ما فيهاش حركة متاع كراهب نادرا وين تعرضك موتور و يكون معروف
نهار و انا مروح من المعتمدية لمنطقتي وكان نهار خميس مع نصف النهار وكانت الدنيا سخانة بحكم صيف في شطر المسافة فما فسقية مهجورة نشوف في راجل واقف بجنبها ولابس بالقدا (bien bien habillé) اللي نادرا في بلاصتنا وين تشوف واحد كيما هكاكا المهم تلفتلو وقعدت مركز معاه وكان عاطيني بالظهر و ما حبش يتلفتلي جملة بالرغم البلاصة خلا و اي واحد و ما عنو ما يعمل غاديكا خاطر بلاصة خلا

ما ركزتش برشا و قعدت نسوق و نتلفت و هو في نفس الهيئة و ما تحركش لين بعدت و معادش نراه توا عادية الحكاية و ما عطيتش اهمية و من غدوة نهار جمعة رجعت و كالعادة وانا مروح تقريبا نفس التوقيت نلقى السيد هذايا في نفس البلاصة كإنو ما تحركش من آمس استغربت الحقيقة لكن ما خفتش نمشوي بالشوية و نتلفتلو و هوا ولا حركة و عاطيني بالظهر نجي باش ناقف نكلمو مبعد نقول كان حاجتو بحاجة راهو عالاقل تلفت و هوا تحريكة لا كان راجل طويل لابس سورية صفرا و سروال ترقال اكحل و سانتير لونها marron

اطراف ايديه و ساقيه ما ريتهمش اما ايديه كانو طوال برشا
حسيلو كالعادة نمشي و نتلفت و السيد مل حبش يتحرك بالرغم شمس تحرق فوق و قايلة خفت شويا و استغربت اكثر فاش يعمل السيد و شبيه م يتحركش من بلاصتو و شبيه موش حاس بالسخانة لي فوق ٤٠ درجة بحكم نحنا في الجنوب تعدات لحكاية ما حبيت نحكي لحد من غدوة رجعت من نفس البلاصة لكن موش وحدي معايا ولد عمي لقيتو روحت بيه معايا عالموتور و قت اللي وصلنا لبلاصة السيد هذاكا ما ثمش موش موجود عاد قلت للي معايا بربي باش نحبسو لحظة هنا نحب نشوف الفسقية فيهاش ما قالي فاش تحكي فسقية مكسرة و مطر ما فمش وصيف وسخانة شنيا هالبلاصة لي

يتبع الجزء 2